අරුල් සත්යනාදන් පත්තර මහගෙදර සහෝදර පත්තර සගයෙකි. අරුල් සේවය කරන්නේ තිනකරන් පුවත්පතේය. ඔහු එහි නියෝජ්ය කතුවරයාය. පසුගිය දිනෙක අරුල් අප සොයා පැමිණියේය.
“මට පොඩි කරදරයක් වුණා.”
ඔහු සෙමෙන් කීවේය. අපි ඔහු හඬට සවන් දුන්නෙමු. වසර ගණනාවක් තිස්සේ අපත් සමඟ සේවය කරන අයෙකු සිළුමිණට මෙවැනි කතාවක් කියන්න පැමිණි පළමු වතාව මෙයයැයි සිතේ.
පත්තර මහගෙදර සේවය කරන කවුරුත් ආයතයට ආදරය කරති. ඒ නිසාම විසිපස් වසරක සේවා ඇගයීම වෙනුවෙන් ලබාදෙන රන්පවුමට කවුරුත් ආදරය කරති. එය ඉතා ඕනෑකමින් රැක ගනිති. අරුල් හා රන් පවුම අතර ඇති සම්බන්ධතාවය කුමක්දැයි ඔබට සිතෙනු ඇත.
අරුල් විසිපස් වසරක සේවා ඇගයීම වෙනුවෙන් රන්පවුම තෑගි ලැබුවේ මේ වසරේ මුල් භාගයේදීය. නමුත් අද ඔහුට ඒ රන්පවුම අහිමි ව ඇත. කොහොම ද ඒක වුණේ? රන් පවුම අහිමි වීමේ කතාව පිටුපස ඇත්තේ ලොකු කතාවකි. අද එය අරුල්ට වුව හෙට අපට සිදුවිය හැකි නිසාය.
“අපි පදිංචිවෙලා ඉන්නේ අවිස්සාවෙල්ලේ පුවක්පිටිය මොරගොල්ල කියන ගමේ පසුගිය දවස්වල මගෙ නෝනයි දුවයි ගමේ ගියා. හය වෙනිදා රෑ නවයයි හතළිස් පහට විතර ඇති මේ සිද්ධිය වෙනකොට. මම වරක් දෙවරක් එළියට ගියා. එක වරම අපේ නිවෙසට දෙදෙනෙක් ආවා. ඔවුන් කිව්වේ මිරිහාන පොලිසියෙන් කියලා. මට කිව්වා කුඩු හංගපු තැන් කියන්න කියලා. මම කිව්වා මම කුඩු ගැන දන්නේ නැහැ කියලා. ඔවුන් මුහුණු ආවරණය කරගෙන හිටියෙ නැහැ. ටිකකින් මේ අය මාව පුටුවක තියලා මගෙ අත්දෙක පිටිපස්සට කරලා බැන්දා. ඇස් දෙකත් බැන්දා. කටත් බැන්දා. ඉන් පස්සේ කකුල් දෙක පුටුවේ කකුලක ගැට ගැහුවා. උන් දෙන්නා මගෙන් ඇහුවා රත්තරන් කෝ කියලා. කට වහලා නිසා හරියට කතා කරන්න බැහැ. මම ගොර ගොර හඬින් කිව්වා රත්තරන් නැහැ කියලා. පැයක් විතර උන් අපේ ගේ ඇතුළේ ඉන්න ඇති. එක පාරටම සාලේ රූපවාහිනියේ සද්දේ වැඩි වුණා. මට දැනුණා උන් ගිය බව. මම අත්දෙක ගලව ගන්න දැගළුවා. එ්ත් බැරි වුණා. කට ගැට ගහලා තිබුණ රෙදි පටිය දත්වලට අහු වුණා. මම එ්ක හැපුවා. යාන්තම් ශබ්දය පිටවන බව දැනුණා. මම කෑගැහුවා. හුඟ වෙලාවකට පස්සේ එහා ගෙදර එක්කෙනා ආවා. වයර් එකට අත්දෙක හිරවෙලා තුවාල වෙලා තිබුණා. 119 කතා කරලා කිව්වා. පාන්දර තමයි පොලිසියෙන් ආවේ. මම අවිස්සාවෙල්ල පොලිසියේ පැමිණිල්ලක් කළා. මුළු ගේම ඇදලා දාලා තිබුණේ. කුස්සියේ කරවල දාලා තිබුණ භාජනය පවා ඇදලා. අල්මාරියේ තිබුණු ඩොලර් හතළිස් පහයි, රුපියල් දාහදාහයි අරගෙන ගිහිල්ලා. මට ඒවා ගැන දුකක් නැහැ. මගේ ජීවිතය බේරුණු එක වාසනාවක්. ඒත් ලේක්හවුස් එකෙන් මට ලැබුණ රන් පවුමත් උන් අරන් ගිහිල්ලා. මම අහලා තියෙනවා හොරු රත්තරන් උණුකරනවා කියලා. ඒක එහෙම නම්..?
අරුල් පවසන්නේ බොහො කනගාටුවෙනි. අරුල්ගේ රන් පවුම ඔහුට සිහිනයක් වනු ඇද්ද?
අරුල්ගේ රන්පවුමේ කතාව අවසානයේ ඔබ මේ ගැනත් අවධානය යොමු කළ යුතුය. ඒ රාත්රියේදී පමණක් නොව ඕනෑම වෙලාවක තම නිවෙස්වලට පැමිණෙන නාඳුනන පුද්ගලයන් පිළිබඳ විමසිලිමත් වීමය...
ඉසවි.