අසීමිත ආසාවන් පසුපස හඹා යෑම වෙනුවෙන් මිනිසුන් මුළාවේ දමමින් මුදල් කොල්ල කෑමට ඇතැම් පුද්ගලයෝ විවිධාකාරයේ වෙස් ගනිති. සිවුරු පොරවාගෙන මිනිසුන් මුළාවේ දමමින් කෝටි ගණනක මුදල් වංචා කළ අයකුගේ කතා පුවතක් පසුගියදා 11 වැනිදා වාර්තා වූයේ අහුන්ගල්ල පොලීසියෙනි.
අහුන්ගල්ලේ ගල්වෙහෙර මළුවවත්ත පුරාණ විහාරස්ථානයේ ගල්කුලමේ සෝරත නමින් වැඩ සිටි ඔහු එම විහාරස්ථානයට ‘වැඩම කොට‘ තිබුණේ තමා විසින්ම බෞද්ධ පුවත්පතක පළ කළ “කැනඩාවේ සිට පැමිණි මහාචාර්ය හිමිනමකට නිදහසේ වැඩසිටීමට විහාරස්ථානයක ඉඩ පහසුකම් සලසා දෙන්න” යන දැන්වීමට ලැබුණු ප්රතිචාරයක් මතයි.
එම විහාරස්ථානය බාර කොස්ගොඩ මහින්ද හිමියන්ටය. මහින්ද හිමියන් පුවත්පත් දැන්වීමට දැක්වූ ප්රතිචාරය මත ඔහු මළුවවත්ත විහාරස්ථානයක් පැමිණියේ මීට මාස පහකට පමණ පෙරදීයි.
විහාරස්ථානයට වැඩම කර ගල්කුලමේ සෝරත නමින් පෙනී සිටිමින් ප්රදේශයේ දායක කාරකාදීන්ගේද සිත් දිනාගෙන විහාරස්ථානයේ දියුණුවට කැප වී සිටියේය. දායකයන්ගේ ආධාර උපකාර ඇතිව රුපියල් කෝටි ගණනක මුදල් වැයකොට විහාරස්ථානයේ ප්රතිසංස්කරණ කටයුතු කර ඇති අතර ඊට එක් දායක මහතෙක් රුපියල් කෝටියකට අධික මුදලක් වියදම් කර ඇති බවටද සැල වේ.
ඒ අතරේ තමා මහාචාර්යවරයෙකු ලෙස හඳුන්වා දෙමින් කැනඩාවේ විශ්වවිද්යාලයක සේවය කළ බවක් ද දායකයන්ට ඒත්තු ගැන්වීය. එසේ විහාරස්ථානයේ සිටින අතරේ තම කැනඩා මහාචාර්ය පට්ටම හරහා ජනතාවට සේවයක් කරන බව හඟවමින් කැනඩාවට යවන බවට ප්රචාරය කොට තිබුණේ අන්තර්ජාලයේ දැන්වීම් පළ කරමිනි.
ඊට ප්රතිචාර දැක්වූ රටේ විවිධ පෙදෙස්වල බොහෝ දෙනෙකු පසුගිය කාල සමය තුළදී විහාරස්ථානයට ඇදී ආවේ තම සිහින මුදුන් පමුණුවා ගැනීමේ අපේක්ෂාවෙනි. එසේ පැමිණි අහිංසක ජනයා තම දහඩිය මහන්සියෙන් උපයාගත් මුදල් පමණක් නොව කනකර අභරණ උකසට තබා ගිනි පොලීකරුවන්ගෙන් ගත් ලක්ෂ ගණනින් මුදල් සෝරත චීවරධාරියාට පිරිනමා තිබුණේ කැනඩාවට පය තැබීමේ බලාපොරොත්තුව මුදුන් පමුණුවා ගැනීමේ අටියෙනි.
එහෙත් පසුගිය 30 වැනිදා සිට ඔහු අහුන්ගල්ල මළුවවත්ත විහාරස්ථානයෙන් නික්ම ගොස් ඇති බවට දායක කාරකාදීන්ට පමණක් නොව එසේ මුදල් ලබා දුන් ජනතාවටද දැනගැනීමට ලැබි තිබේ.
ඔහුගේ ‘ගැටය’ට හසුවූ යුද හමුදාවේ සිවිල් රියැදුරකු ලෙස සේවය කරන අනුරාධපුරේ වෙසෙන 35 හැවිරිදි චන්දන තිලකරත්න සමඟ කතාබහ කිරීමට අපට හැකි විය.
“වෙන්න තියෙන හැම දෙයක්ම වුණා මහත්තයෝ... අපි හතර දෙනෙක්ම අහුවුණා මේ හොර වැඩේට... අපි කට්ටියම සල්ලි දුන්නෙ පොලියට අරන්. මගේ යාළුවෙක් ගිය අවුරුද්දට කලින් දිනෙක අහුන්ගල්ලෙ පන්සලක උත්සවේකට ගියා. හාමුදුරු වෙස් ගත් හොරාත් ඒ උත්සවේට ඇවිල්ලා තිබුණා. ඔහුගේ රියැදුරා වූ ඉන්දික කියන කෙනා තමයි මේ ගැන මගේ යාළුවට කියලා තිබුණේ. පස්සෙ අපි හතර දෙනෙක්ම ගියා අහුන්ගල්ලෙ පන්සල හොයාගෙන. එදා සිහින ලෝකෙකට තමයි අපව අරන් ගියේ. ඉක්මනට පොත හදාගන්න කිව්වා. මුළු ගමනටම ලක්ෂ 20ක් යනවා, ලක්ෂ කීයක් හරි දෙන්න කිව්වා. ඉතිරි මුදල් ගියාම පඩියෙන් කැපෙන්න ගන්නවා කිව්වා.”
ඒ අනුව ඉන්දික ඇතුළු පිරිස නැවතත් අහුන්ගල්ල මළුවවත්ත විහාරයට ගොස් ලක්ෂ දෙක, තුන ආදි ලෙස සිවුදෙනාම මුදල් පිරිනමා පැමිණ ඇත්තෙ ලක්ෂ ගණනක් මුදලක් දුන් බවට ලියුම් කඩදාසියක් පමණක් රැගෙනය.
“සල්ලි දීලා මාස දෙකක් විතර ගියා. මුලින් කිව්වා තිහක් ගෙනියනවා. පස්සෙ කිව්වා පහළොවක් ගෙනියනවා. ඔහොම කිය කියා ඉන්නකොට අපිට පුංචි සැකෙකුත් ආවා.”
චීවරධාරියා අතුරුදන් වූ බවට සැලවූ පසුගිය 30 වැනිදා වූයේ කුමක්දැයි මා විමසීය.
“අපිට මෙඩිකල් යන්න 30 වැනිදා උදේ පාන්දර කොළඹට එන්න කිව්වා. අපි ඇවිල්ලා කොළඹ පිටකොටුවේ බස් නැවතුම ළඟ බේරේ වැව ගාවට වෙලා හිටියා. එතැන ඔක්කොම එදා 25ක් විතර හිටියා. අපි උදේ 8.30ට විතර කෝල් එකක් ගත්තා. එතකොට කිව්වා එන ගමන් කියලා. නැවතත් 9.30ට විතර ගත්තා. එතකොට නම් ෆෝන් එක වැඩ කළේ නෑ. මගේ යාළුවෙක් ගත්තා ඉන්දික කියන රියැදුරාට කෝල් එකක්. ඔහු කිව්වා හාමුදුරුවෝ වීල් එකක නැඟලා ගියා කියලා. පස්සෙ අපි සෝදිසි කරලා බලන කොට තමයි දැනගන්න ලැබුණේ සල්ලිත් අරන් පැනලා කියලා.”
එදා ඔහුගේ ‘ගැටය’ට හසුවූ අවිස්සාවේල්ල, අනුරාධපුර, මාතර, හලාවත, ආණමඩුව, මතුගම, අගලවත්ත, නුවරඑළිය, හල්දුම්මුල්ල, අහුන්ගල්ල ආදි රටේ නන්විධ පෙදෙස්වල පිරිස අහුන්ගල්ල පොලීසියට පැමිණියහ. ඒ සමඟ ඇල්පිටිය කොට්ඨාස බාර පොලිස් අධිකාරී නිහාල් තල්දූව සහ අම්බලන්ගොඩ සහකාර පොලිස් අධිකාරි සිසිර පෙත්තතන්ත්රිගේ ප්රධානත්වයෙන් අහුංගල්ල පොලිස් ස්ථානාධිපති ප්රධාන පොලිස් පරීක්ෂක සම්පත් පත්මලාල්ගේ මෙහෙයවීම මත අපරාධ අංශයේ ස්ථානාධිපති හේමන්ත ජයසූරිය, පො.සැ. (11478) පෙරේරා, පො.කො. (86252) සුරංග ප්රමුඛ පිරිස සිවුරු පොරවාගෙන මිනිසුන්ගේ මුදල් කොල්ල කෑ ඔහු සොයා සූක්ෂ්ම මෙහෙයුමක් දියත් කළේය.
ඒ අනුව ඔහු සතුව තිබූ දුරකථන අංක කීපයටම පොලීසිය ඇමැතුම් ගත්තේය. එම ඇමැතුම්වලට පෙරළා ප්රතිචාර දැක්වූ ඔහු පොලීසියට ඇමැතුමක් ගෙන තිබිණි. එම අංකය පොලිස් නිලධාරින්ට සොයා ගැනීමට හැකි විණි. එම අංකයට පොලීසිය විසින් ඇමැතුම් දුන් පසුව එක්වරම කතාකොට ඇමැතුම විසන්ධි කළ බව පරීක්ෂණ නිලධාරියෙක් කීවේය.
ඒ අනුව ඔහු සිටින ඉසව්ව සොයාගත් පොලීසිය හලාවත ප්රදේශයේ පිහිටි නවාතැන් පහසුකම් සහිත හෝටල්වලට ඇමැතීමෙන් චීවරධාරි වෙස් ඉවත්කොට සිටි පුද්ගලයෙකු ගැන තොරතුරක් ලැබිණි. පුද්ගලයන්ගේ වෙස් ඉවත් කිරීම් පිළිබඳ හොඳ ‘ඉව’කින් සිටි අහුන්ගල්ල පොලිස් ස්ථානාධිපතිවරයා ඇතුළු පිරිස නිශ්චිත ලෙස තීන්දු කළේ ඔහු චීවරධාරියාම බවයි.
ඒ අනුව හලාවත මාරවිල ප්රදේශයේ හෝටලයක සිටියදී අත්අඩංගුවට පත්වූ ඔහු කුරුණෑගල, යන්තම්පලාවේ පදිංචි 55 හැවිරිදි වන්නිනායක හේරත් මුදියන්සේලාගේ ගාමිණි වන්නිනායක නමැත්තා බවට හඳුනාගත්තේය.
එලෙස භික්ෂූ වෙස්ගත් ඔහු අත්අඩංගුවට පත්වන විටත් මිනිසුන්ගෙන් කොල්ලකෑ රුපියල් එක්කෝටි අටලක්ෂ විසිදහසක්ද මුදලක්ද දෙලක්ෂ හැටදහසක් වටිනා රන්භාණ්ඩද රුපියල් ලක්ෂ හැත්තෑවක් පමණ වටිනා හයිබ්රිඩ් ජීප් රථයක් සහ රුපියල් පහළොස් දහසක් වටිනා ඔරලෝසුවක්, ජංගම දුරකථන කීපයක් සහ ටැබ් පරිගණකයක්ද විය. ඔහු විසින් රටින් පැන යාමට ගුවන් ගමන් බලපත්ර රැසක්ම සකස් කරගනිමින් එම හෝටලයේ රැඳී සිටි බවට පොලීසිය ඉදිරියේ පාපෝච්චාරණය කෙට ඇත.
අත්අඩංගුවට ගැනීමෙන් පසුව බළපිටිය වැඩබලන මහේස්ත්රාත් ඉසෙඩ්. ඊ. ලියාකාත් මහතා වෙත ඉදිරිපත් කිරීමෙන් අනතුරුව ලබන 21 වැනිදා දක්වා රක්ෂිත බන්ධනාගාර ගත කිරීමට නියෝග කෙරිණි. මොහු පිළිබඳව වැඩිදුරටත් සොයා බැලු පරීක්ෂණ නිලධාරීන්ට සොයා ගැනීමට හැකි වී තිබුණේ අහිංසක මිනිසුන් රවටා ලබාගත් මුදල්වලින් තවත් මෝටර් රථ කීපයක්ම මේ ලබාගෙන විකුණා ඇති බවයි. එම මෝටර් රථ දෙක වූ ලක්ෂ දහසයක මුදලකට විකිණු කැබ් රථය මිනුවන්ගොඩ ප්රදේශයෙන්ද ලක්ෂ නවයහමාරකට මාරවිලට විකිණු ලොරි රථයද අහුන්ගන්න පොලීසිය පොලිසිය සොයාගෙන තිබේ.
එසේම ඔහුගේ කල්ක්රියා නිසාම 1996 වසරේ සිටම අයිආර්සී කාරයෙකු ලෙස පොලිස් පොත්වල නම සටහන් කරගෙන ඇත. මොහුට විරුද්ධව මංකොල්ල කෑම් සහ මිනිසුන් රවටා මුදල් කොල්ල කෑම හේතුවෙන් වත්තල පොලීසියට දහසය වතාවක් පැමිණිලි ලැබී තිබෙද්දී පොලොන්නරුව පොලීසියටද කොල්ලකෑම් පිළිබඳව පැමිණිලි රාශියක්ම ලැබී තිබේ. අහුන්ගල්ලේදී මොහුගේ රැවටීමට හසුවූ පැමිණිලි 35ක් මේ වන විට ලැබී තිබෙන අතර තවත් අය සිටී නම් ඒ පිළිබඳව පොලීසියට පැමිණිලි කරන ලෙස ඉල්ලා සිටී.
සේයාරූ - බළපිටිය සමූහ දිලීප් නිශ්ශංක