සියලු දෙනාගේ අවධානය දිනා ගත් හරි අපූරු සිදුවීම් දෙකක් පසුගියදා අවසන් වූ ශ්‍රී ලංකාව සහ දකුණු අප්‍රිකාව ක්‍රිකට් තරගාවලියේදී දැක ගැනීමට හැකි විය. ඒ පසුගිය 5 වැනිදා හා 12 වැනිදා පැවති තරග අතරතුර ය. ශ්‍රී ලංකාව සහ දකුණු අප්‍රිකාව අතර මහනුවර පල්ලෙකැළේ ක්‍රීඩාංගණයේදී ඉකුත් පස්වැනිදා පැවැති එක්දින තරගයේදී ශ්‍රී ලංකා පිලට අත්වූයේ ලකුණු 78 ක අමිහිරි පරාජයකි. එහෙයින් මේ තරඟය අවසන් වන තෙක් නැරඹීමට තරම් සතුටුදායක තත්ත්වයක නොවුණි. මේ නිසා තරගය නරඹමින් සිටි ප්‍රේක්ෂකයන් බොහෝ දෙනා තරගය අවසන් වීමටත් ප්‍රථම ක්‍රීඩාංගණයෙන් ඉවත්ව යනු පෙනුණි. ඒ අතර ක්‍රීඩා පිටියේ රැඳී සිටි ක්‍රීඩාලෝලීන් පිරිස ශ්‍රී ලංකා කණ්ඩායම අවසන් පන්දුව දක්වාම සටන තුළ රඳවා තැබීමට මහත් වෑයමක් දරමින් ඔල්වරසන් දෙමින් උනන්දු කරන ආකාරයක් ද දක්නට ලැබිණි. නමුත් ඉතාම අවාසනාවන්ත ලෙස එ් තරගයේ පරාජය බාර ගැනීමට අපට සිදු විය. තත්ත්වය එසේ තිබියදී දෑසට සතුටක් එක් කළ දර්ශනයක් දිස්වූයේ මේ අතර ය.
මේ තරගයේ අවසන් පන්දුව තෙක් ක්‍රීඩාංගණයේ රැඳී සිටි අග්නිදිග විශ්වවිද්‍යාලයේ සිසුන් පිරිසක් තමන් සිටි තැනින්වලින් නැඟිට අවට තැන තැන දමා ගිය කැළි කසළ එකතු කරමින් ඒ සියල්ල එක තැනකට ගෙනැවිත් පිරිසිදු කිරීමට පටන් ගත්තේ ය. මේ ක්‍රියාව දුටු, තරගය අවසානය දක්වා රැඳී සිටි සෙසු ප්‍රේක්ෂකයෝ ද ඒ අනුව යමින් තම අවට තිබූ කැළි කසළ, හිස් වතුර බෝතල්, රිජිෆොම් කෑම බහලුම්, ප්ලාස්ටික්, පොලිතින් බෑග් එක තැනකට එකතු කරන්නට පටන් ගත්තෝ ය. කෙටිකාලයකින් ක්‍රීඩාංගණය අවට කැළි කසළවලින් තොර කලාපයක් බවට පත් විය. තරඟය පරාජය වීම නිසා සිත කම්පා වුව ද කිසියම් යහපත් පැවැත්මකින් අපි ජයග්‍රහණය කරන ආකාරය දුටු විට සිත අමන්දානන්දයට පත් විය. අනතුරුව පසුගියදා (12වැනිදා) කොළඹ ආර් ප්‍රේමදාස පිටියේ දී ශ්‍රී ලංකාව සහ දකුණු අප්‍රිකාව අතර පැවති පස්වැනි එක්දින තරගයේදී ද මේ ආකාරයට ම තරඟය නිමා වී ප්‍රේක්ෂකාගාරයේ රැඳී සිටි ක්‍රීඩා ලෝලීන් පිරිසක් පෙර සත් ක්‍රියාවේ නිරත වන ආකාරය දක්නට ලැබුණි. ඔවුන් ක්‍රීඩාංගණය, ප්‍රේක්ෂකාගාරය පමණක් නොව ඒ අවට තිබූ සියලු කැළි කසළ එකතු කරමින් පිරිසිදු කරන ආකාරය කාගේත් කතාබහට ලක් විය.
පල්ලෙකැලේ ක්‍රීඩාංගණයෙන් ඇරඹි මේ යහපත් ක්‍රියාව අපට පෙන්වන්නේ විනය ගරුක සමාජයක් ගොඩනැඟීමට මිල්ටරි පාලනයක් අවැසි නොවන බව ය. මිල්ටරි පාලනයක් අවැසි යැයි නන්දොඩවන ඇතැමුන්ට ප්‍රේක්ෂකයන් දුන් මේ ආදර්ශය පමණක් වුව ප්‍රමාණවත් ය. කළ යුත්තේ තමන් අක්‍රමවත් ව හා අවිධිමත් ව බැහැර කරන කැළි කසළ නිවැරදිව බැහැර කිරීමට කටයුතු කිරීම ය. ඒ සඳහා අවශ්‍ය වන්නේ ආකල්පමය වෙනසක් පමණි.
මීට කලකට ඉහත මීතොටමුල්ල කුණු කන්ද පුපුරා ගොස් සිදු වූ මහා විනාසය අද අපට අමතකය. එහිදී ජීවිත විනාස වී ගෙවල් දොරවල් හතළිහකට වැඩි ප්‍රමාණයක් විනාශ වූ බව ද අද අපට අමතක ය.
මේ අමතක ව ගිය අතීතය නැවත වතාවක් මතක් කර ගැනීමට කාලය එළැඹ තිබේ. මේ කාගෙවත් කුණු නොව අප විසින් හිතාමතා බැහැර කරන දෑ ය. එසේනම් එය හිතාමතා නිවැරදිව බැහැර කිරීම අප කාගේ යුතුකමකි. එමඟින් අවට පරිසරය ලස්සන වනවා පමණක් නොව ඩෙංගු වැනි මාරාන්තික රෝග පැතිරීම වළක්වා ගනිමට ද හැකි වේ.
පාරිසරික සනීපාරක්ෂාව තහවුරු වූ වට පිටාවක් නිර්මාණය කර ගැනීමට මෙනිසා අපට හැකි වේ.
එනිසා මේ ආදර්ශය රටට කියාදුන් අග්නිදිග විශ්වවිද්‍යාලයේ විද්‍යාර්ථීන්ට මෙරට පුරවැසි සැමගේ ගෞරවය හිමි වන අතර මේ සත් ක්‍රියාවට දායක වූ අනෙකුත් ජනතාවට ද එ් ගෞරවය එලෙසින් ම හිමි වේ. මෙය මෙතැනින් නොනැවති රට පුරා ව්‍යාප්ත කර කැළි කසළවලින් තොර රටක් බවට මේ රට පත් කිරීමට කටයුතු කිරීම සැමගේ අරමුණ විය යුතුය.
මේ ක්‍රියාව සම්බන්ධයෙන් සමාජ ජාලවල පළ වූ අදහස් කිහිපයක් පහතින් දක්වමු.
• හිස් බෝතල් වලට වඩා කුණු වෙච්ච පුස් ඔළුගෙඩිවලින් සමාජයට විශාල හානියක් සිදු වෙනවා. හිස් ප්ලාස්ටික් බෝතල්වලින් සිදුවෙන පරිසර දුෂණයට කෙටි කාලීන විසඳුම් තිබුණත්, කුණුවෙලා තියන ඔළුගෙඩිවලින් කරන සමාජ දුෂණයට දීර්ඝ කාලීන විසඳුම් අවශ්‍යයි.
• හොඳ දරුවන් පිරිසක්. පරිසරය යනු අපේ ජීවිතයයි. පරිසරය නැසුණොත් ජීවයට පැවතිය නොහැකිය. නමුත් බොහෝ පිරිසක් වන්දනාවේ යන විට ගස් හෙවණේ සිට විවේක ගෙන පොලිතීන් එ් සෙවණ යට අතහැර යයි. එවන් බහුතරක් අතර මේ දරුවන් අගය කළ යුතුයි. දීර්ඝායුෂ ලැබේවා; දිවිමඟ සරු වේවා.
• මේක හොඳ ආරම්භයක් ඇත්තට ම. ඉස්සරට වඩා දැන් මිනිස්සු පාරේ කුණු දානවා අඩුයි. කාලෙකට පස්සේ ලංකාවට යන කෙනකුට ඒ වෙනස හොඳට තේරෙනවා. ඉස්සරට වඩා කුරුණෑගල ටවුමේ පාරවල් අයිනේ කුණු දාලා තියනවා. ගොඩක් දුරට අඩුයි දැන්. එ්කට සමාජ මාධ්‍ය ගොඩක් රුකුලක් වුණා කියලා තමයි මට හිතෙන්නේ. මෙවන් දේවල් තමයි අපි විශ්වවිද්‍යාල ළමයින්ගෙන් බලාපොරොත්තු වෙන්නේ ඔබලාට ගොඩක් ස්තුතියි.. මෙය අරම්භ කළාට මෙයින් පසු මිනිසුන් පුරුදු වෙයි; ක්‍රීඩා තරගයක් උස්සවයක් වගේ ඉවරවුණාම අවට පිරිසිදු කරලා යන්න.
• ගෙදරත් අම්මා හරි කවුරු හරි අතුගානවා කියලා කුණු දානවද තැන තැන? නොදා ඉන්නව නම් තමයි හොඳ. ඒත් මේ කරපු හොඳ දේට හොඳයි කියන්න බැරි නම් ඒක කුහකකමක්. නගරසභාවට වෙන දෙයක් කරන්න පුළුවන් ඒ වෙලාවට. මේක දැක්කම අඩුම ගානේ 10ක් වත් කුණු නොදා ඉඳියිනේ. ඒක ම ලොකු ජයග්‍රහණයක්.
ඡායාරූප - සමීර පීරිස්
