පොල් වැටෙනවාට වඩා රුපියල් වැටුණේ ඇයි? | සිළුමිණ

පොල් වැටෙනවාට වඩා රුපියල් වැටුණේ ඇයි?

 ‘පොල් ගෙඩියට සාපේක්ෂව රුපියල අවප්‍රමාණය වෙලා’

‘මං මේ ඇහුවමයි ඔය වගේ කතාවක්’

‘පොල් ගෙඩියට සාපේක්ෂව සමහර වෙලාවට රුපියල ප්‍රතිප්‍රමාණය වෙනවා. සමහර වෙලාවට අවප්‍රමාණය වෙනවා’

‘මං අහල තියෙන්නේ ඩොලරයට සාපේක්ෂව රුපියල අවප්‍රමාණය වෙලා කියලා.’

‘ඒක තමයි ජනප්‍රිය කතාව. ඒත් ඇත්ත කතාව රුපියල පහළ බැහැළ තියෙන්නේ පොල් ගෙඩියට සාපේක්ෂව කියන එක’

‘පැහැදිලි මදි’

‘දැං කියනවනේ ඉස්සර ඩොලර් එකට රුපියල් එකසිය පනහක් ගෙවන්න වුණා දැන් එකසිය හැටක් ගෙවන්න වෙලා ආදී වශයෙන්’

‘ඔව් ඉතිං’

‘ඉතිං ඒ වගේ ඉස්සර පොල් ගෙඩියට රුපියල් පනහක් ගෙවන්න වුණාට දැන් හැත්තෑවක් අසූවක් අනූවක් ගෙවන්න වෙන වෙලාවල් තියෙනවා’

‘ඒ කියන්නේ එතකොට පොල් ගෙඩියට සාපේක්ෂව රුපියල පහළ බැහැලා කියන එක’

‘ඔව් දැන් හැමෝම ඩොලරයට සාපේක්ෂව රුපියල පහළ බහින්න හේතු කියනවා. විශ්ලේෂණය කරනවා’

‘ඇත්ත තමයි’

‘ඒ වුණාට පොල් ගෙඩියට සාපේක්ෂව රුපියල පහළ බහින්න හේතු හොයන්නේ නෑ’

‘ඩොලර් ගැන කතා කරන එක තරම් පොල් ගැන කතා කරන එක ලස්සන නෑ’

‘ඒක හරි ඒ වුණාට දැං ටික ටික ඩොලර් එක තරමට ම පොල් වටින යුගයක් ඇවිත් තියෙන්නේ

‘ඒක ඇත්ත. දැං ඩොලර් එකකට පොල් ගෙඩි දෙකක් ගන්න අමාරු තත්ත්වයක් ඇවිත් තියෙන්නේ’

‘එහෙම වුණේ ඇයි’

‘ඒක ඇත්ත. ඩොලර් ගැන හොයනවාට වඩා පොල් ගැන හොයන එක වටිනවා’

‘පොල් වැටෙනවාට වඩා රුපියල වැටුණේ ඇයි?’

‘ඒකට හේතු ආර්ථික විශේෂඥයෝ දන්නවද?’

‘අපේ රටේ ගොවි මහත්තුරු දන්නවද?’

‘අපේ රටේ මන්ත්‍රීතුමන්ලා දන්නවද?’

‘රුපියල බාල්දු වෙලා වගේ දේවල් ගිරවු වගේ කියනවා ඇරෙන්න වෙන දෙයක් කියන්න

දන්න අය එතුමන්ලා අතර අඩුයි’

‘ඇත්තටම ලොකුවට ඉබේ වැවෙන නිසා මිනිස්සු ඉබේ පොල් වැවෙන කං බලාගෙන හිටියා’

‘ඒ වගේම හැම තැනම වගේ පොල් පේන්න තියෙන හින්ද පොල් ගහක් වවන්න කල්පනා කළේ නෑ’

‘පොල් ගහේ ගෙඩියක් හරි ඉබේ හැදෙන නිසා පෝර ටිකක් ළංකරන්න හිතුවේ නෑ’

‘පොල් කැඩෙන ඉඩම් වෙන්දේසිවලින් කැඩිලා ගියා’

‘තව හේතු තියෙනවා. ඒවා හොයන්න කවුරුවත් එච්චර උනන්දු නෑ. ඩොලර් රුපියල් වැටෙන හැටි ම බලාගෙන ඉන්නවා ඇරෙන්න පොල් වැටෙන හැටි බලන්න කාගෙවත් උනන්දුවක් නෑ’

‘ඔව් පොල්වලට වඩා කලටි වැටෙනවා’

සිහිනෙන් මට සිතුණේ මා දකින්නේ එලොව පොල් බවය. ඒ නිසා වැඩිය සිහින දකින්නේ නැතිව කඩිමුඩියේ අවදි වුණෙමි.

අදහස්