|
||||||||||||||||||||||||||||||||||||||||||||||||||||||||||||||||||||||||||||||||||||||||||
විවිධ මතිමතාන්තරවලින් පිරී ගිය අතීතයකට උරුමකම් කියන මේ අද්භූත භූමියේ දෑස අදහාගත නොහැකි බොහෝ දෙයින් පිරී පවතින්නේ හරිම අපූරුවට. මේ භූමියේ පස තද රතු පැහැයක එසේත් නොමැතිනම් කුණු ලේ පැහැයක් ගන්නවා. තෘණ විශේෂ තැනිතලාව පුරා දිව ගියත් ඇතැම් තැන්වල කිසිදු ශාකයක් හටගන්නේ නැහැ. මුහුද දෙසට නෙරා ගිය මේ කඳු ගැටය ඇතැම් කාලවලදී සංචාරක පක්ෂීන්ගේ පාරාදීසයක්. තවත් විටෙකදී අපේ රටේ කොතැනකදීවත් හමු නොවන ශාක වර්ග මේ පිටියේදී දක්නට පුළුවන්. පිටසක්වළ ජීවීන් සමඟ සෘජු සබඳතාවයක් පවත්වා ගන්නා බිමක් ලෙස හඳුන්වන උස්සන්ගොඩ වටා ගෙති ඇති ජනකතා බොහෝමයි. හනුමන්තා ගෙන ආ බෙහෙත් කන්දෙන් පතිත වූ තවත් කුඩා කැබැල්ලක් ලෙසටත් ගැමියන් උස්සන්ගොඩ හඳුන්වා දෙනවා. අපේ රටේ අති දුර්ලභ ඖෂධ වර්ග රැසක් මේ අද්භූත විස්මය ජනක බිමෙහි දකින්න පුළුවන්. ඉහත ජනකතාවට ඔවුන් මේ ඖෂධ සාක්ෂි ලෙස ගොනු කොට ගන්නේ හරිම අපූරුවට. උස්සන්ගොඩ තැනිතලාව පුරාවට තවත් සුවිශේෂි ගල් විශේෂයක් දක්නට ලැබෙනවා. අර්ධ ලෙස උණුවී වෙනස් හැඩයක් ගත් පාෂාණ ලෙස පෙනී ගියත් තවත් විටෙකදී මේ පාෂාණ රතු පැහැය උසුලන පස් එක්වී සැදුණු බවයි පෙනෙන්නෙ. ඔබ පුදුමයටත් ආස්වාදයටත් පත් කරන මේ සොඳුරු බිම් තීරයේ සොඳුරු දසුන් බොහොමයක් එක්තැන් වී තිබෙන්නේ හරිම අපූරුවට. රතු පැහැති පසත්, ඒ මත වන අද්භූත පාෂාණත් ඒ වටා බැඳුණු ජනකතාත් අසමින් දැන් ඔබ පිවිසෙන්නේ තැනිතලාවේ ඉම වෙතටයි.
මුහුද දෙසට නෙරා ගිය මේ තැන්නේ සිට මුහුද දෙස බැලීමත් නැවත තැනිතලාවේ මහා කෙළවර දිහා බැලීමත් දැන් ඔබට හැකියි. ඔබ මීට පෙර කිසිදු අවස්ථාවක නොදුටු ඉන්දියන් සාගරයේ සොඳුරු මනරම් දසුන් දැන් ඔබට පෙනෙනවා නියතයි. උස්සන්ගොඩ දෙසට ගලා එන මුහුදු රළ ඈත මුහුදේ සිට බිඳී විසිරෙන අපූරු චිත්රය දැන් ඔබේ නෙත් වසා ගනිවී. බලන්න... කොතරම් සොඳුරු ද මේ දසුන්? සොබාදම් මාතාව මැවූ අප වෙනුවෙන්. උස්සන්ගොඩ තැනිතලාවේ මුහුද දෙසට වන්නට පිහිටි කෙළවරේ පැයකට ආසන්න කාලයක් මුහුද දෙසට නෙත් යොමා සිටියහොත් ඔබට මුහුදු දියණිය කොතරම් සුන්දර නර්තනයක යෙදෙනවාදැයි බලාගන්නට කදිම දුලභ අවස්ථාවක් හිමි වෙනවා. ඇතැම් විට දී මේ සොඳුරු දසුන් අපට ඇස ගැටෙන්නේ ජීවිතයේ එක් වතාවක් පමණක් වෙන්නටත් පුළුවන්. මේ තණබිමට වරින් වර පැමිණෙන අනේකවිධ පක්ෂින්ගේ රාවයත්, මුහුදු සුළඟ දිගේ ගොඩබිම වෙතට ඇදෙන භූමිය වසා ගත් ශාකයන්ගේ පිපි මල් සුවඳත් විඳිමින් පැය කිහිපයක් මේ අභිරහස් බිමෙහි ගත කරන්නට ඔබට පුළුවන්. ඒ වගේමයි. දරු දැරියන් සමඟ එක් දිනක් ගත කරන්නට ද මේ සොඳුරු බිම කදිමයි. ලොව පුරා පරීක්ෂකයන්ගේ නෙතු යොමුවූ උස්සන්ගොඩ ලස්සන බලන්න ඔබත් එන්න. කතරගම යන අතරතුරදී මේ බිමට ගොඩ වෙන්න. පෙර ඔබ කිසිදා නොදුටු, නෙත් මවිත කරන දසුන් මේ බිමේ ඕනෑ තරම්. ඒ ඔබ වෙනුවෙන්.
| |
|||||||||||||||||||||||||||||||||||||||||||||||||||||||||||||||||||||||||||||||||||||||||
|
